قسم عمارة في الدلتا

alaa الخميس أبريل 08, 2010 9:42 pm

[center]السلام عليكم ورحمة الله وبركاته

إأولاً احب اعرفكم بنفسي إسمي ألاء بدرس في هندسة الدلتا فرقة اولي قسم عمارة
وزي ما بيقولو المرضوع بيبان من عنوانه أنا ناويه أتكلم معاكو علي قسم عماره وطبعاً كلامي موجه خصوصاً لطلبة إعدادي يا رب أقدر أفيدكم...
يا جماعة قسم عماره قسم لذيذ جداً ومعروف أنه بتاع الناس الرايقه وسيبك من اللي بيقولو ده قسم صعب ومحتاج شغل كتير ومجهود .. إحنا فعلاً بنبذل مجهود بس بمزاج يعني بنكون مستمتعين وإحنا بنشتغل رواقه يعني .. معندناش مذاكرة اد كده .. مواد الترم الأول
عندنا 3 مواد تقدرو تقولو رخمين شويه ده طبعاً بالنسبه للناس اللي مش ناويه تفتح كتاب خالص
وهما رياضة وإنشاءات ومساحه
وماده نظريه مش بتتذاكر غير ليلة الإمتحان هي ماده عبيطه كده زي البيئه والإنتاج اللي بندرسهم في إعدادي وهي إسمها تاريخ ونظريات العماره .. أه نسيت أقولكو دي ملهاش سكاشن هي محاضره واحده سقيمه في الأسبوع وعلي كده
عندنا بقي مادتين هما صميم قسم عماره الأولي إسمها إنشاء ودي بندرس فيها العنواين اللي بيخدوها مدني يعني قشور كده وخلاص والتانيه إسمها تصميم الماده دي بقي اللي بنعمل فيها المشاريع ومفيش حاجه إسمها عملت مشروع غلط أو صح يعني كل ما تشتغل في المشروع كل ما درجتك بتعلي فيه ..هي عامله كده زي الرسم اللي بناخدو في الإعداديه يعني لو المصحح عجبو الرسمه بيديك درجه عاليه معجبهوش بتاخد درجه وحشه وهكذا....

هي دي مواد الترم الأول فيها مذاكره بس أكيد أكيد مش زي مذاكرة مدني او إتصالات

نيجي الترم التاني
عندنا 6 مواد بردو
واحده سقيمه إسمها خواص مواد وبقول سقيمه لأنها زي الإنتاج وزي البيئه اللي بناخودها في إعدادي يعني نحفظ قبل الإمتحان بليله ونرص في الإمتحان وخلاص
فيه ماده إسمها تقارير فنيه دي بنتعلم فيها إزاي نعمل بحث أو تقرير أو خطاب أو كتاب كده يعني بتعلمنا إزاي نقدم نفسنا للمجتمع وإزاي نسوق لنفسنا ونعمل شوية الحبشتكنات المكمله ... لأن المهندس المعماري لازم يكون تاجر شاطر ولبق ولسانه حلو ويفهمها وهي طايره فالماده دي بتساعد علي كده
نيجي لماده إسمها إدراك بصري .. شوفتو قبل كده واحد راسم لوحه بالرصاص بورتريه مثلا أو منظر حلو...الماده دي بتعلمنا إزاي نمسك القلم الرصاص حلو وإزاي ندي بيه تأثيرات عاليه وكمان بنتعلم إزاي نلو بألوان جواش والوان مياه وطبعاً دي بتكون متعه

كمان هندرس مادة الظل والمنظور ودي باينه من إسمها هنتعلم إزاي نعمل الظل للرسمه اللي رسمناها لو كنت راسم شخص مثلاً وعايز تعملو ظل وهكذا والمنظور بيعلمنا إزاي نعمل شكل مجسميعني ليه 3 ابعاد
وأخر الكلام هندرس مادتين الترم الأول اللي هما الإنشاء والتصميم المعماري

لو لاحظتو الترم التاني تقريباً مش بنذاكر خالص كل اللي بنعملو نمسك القلم الرصاص ونبدأ نرسمأحب أحذركو قسم عمارة زي ما هو ممتع ومفيهوش مذاكره إلا إنه محتاج حضور بنسبة ميه في الميه يعني الحضور اهم حاجه
أه كمان نسيت أقولكو القسم ده بيسموه قسم الأغنياء لأننا بنصرف فيه بالعبط اهالينا بيلطمو يعنيsanta: ويا بنات يا حلوين من نظري ده انسب قسم ليكم سيبكو من مدني والوقوف تحت الشمس ده حتي مضر للبشره Cool

**folla** الجمعة أبريل 09, 2010 11:33 am

شكرا جدا علي المعلومات دي يا الاء وربنا يوفقق

maged الأحد أبريل 11, 2010 5:14 pm

شكرا بجد ع الافاده يا الاء وربنا يسترها ونعدى السنة دى

قسم عمارة في الدلتا

قسم عمارة في الدلتا

رد: قسم عمارة في الدلتا

رد: قسم عمارة في الدلتا